ღვედის ნაეკლესიარი სოფლის სასაფლაოს სამხრეთ განაპირას მდებარეობს. იგი განლაგებულია რელიეფიდან მკვეთრად ამოზიდულ ბორცვზე. ორგვლივ გალავნის ფრაგმენტები იკითხება. ეკლესია თითქმის საძირკვლის დონემდეა დანგრეული. მართკუთხა გეგმის (7.5X5.8 მ) ეკლესია ერთ საფეხურიან ცოკოლზე დგას. ირგვლივ მიმოფანტულია ეკლესიის საპირე ქვები. შესასვლელი დასავლეთით აქვს დატანილი. ინტერიერში იატაკზე ქვის ფილები იკითხება, რომლითაც როგორც ჩანს იატაკი იყო დაგებული. საკურთხეველი (2.40X3 მ) ერთი საფეხურით არის გამოყოფილი მთლიანი სივრციდან. საფეხურზე სვეტები დგას, რომელთა შორის არსებული მონაკვეთები ქაოტურად დალაგებული ფლეილი ქვებითაა ამოყვანილი. ჩრდილოეთ კედელზე კარგად იკითხება სამშენებლო ტექნიკა. კედლის შიდა და გარე პირი თლილი კვადრებით არის ამოყვანილი, ხოლო მათ შორის არსებული სივრცე რიყის ქვებითა და კირის დუღაბით არის ამოვსებული.